Tuesday, October 15, 2013

தமிழ்கொண்டே சென்றிடுவாய்

இனியக் குரலெடுத்து இனிமையாய்
இப்புவி பிறந்திட்ட குழந்தாய்
இனிதாய் வளமாய் அன்பாய்
இனி நீயும் வளர்ந்திடுவாய்

அம்மாவின் அரவணைப்பில்
அப்பாவின் அன்பில்
அறிவும் பண்பும் கலந்தே
அமுதென வளர்ந்திடு ஆன்றோனாய்

மாதா பிதா குரு
மறக்காமல் ஏற்றிப் போற்றிடுவாய்
மண்படைத்த தெய்வமும்
மகிழ்வுறப் பின்  வணங்கிடுவாய்

அறநெறி சங்கச்சுவை பலவுண்டு
அவற்றைக் கருத்தாய் கற்றிடுவாய்
அழுத்தமாய் உள்ளத்தில் பதித்திடுவாய்
அவற்றின் வழிநடக்க உறுதிகொள்வாய்

தேவைக்குப் பிறமொழி பேசினும்
தேன்தமிழ் உயிராய்ப் பேசிடுவாய்
தேங்கிப் பழமையில் ஊறாமல்
தேயாமல் புதுவுலகில் பிணைத்திடுவாய்

செந்தமிழைச் செம்மையாய்ப் பற்றிடுவாய்
செம்மொழி நிலவிலும் பதித்திடுவாய்
செவ்வாயோ எவ்வாயோ எக்கிரகம்
சென்றினும் தமிழ்கொண்டே சென்றிடுவாய்

24 comments:

  1. /// அழுத்தமாய் உள்ளத்தில் பதித்திடுவாய்
    அவற்றின் வழிநடக்க உறுதிகொள்வாய் ///

    அருமையான வரிகள் பல... வாழ்த்துக்கள்...

    ReplyDelete
    Replies
    1. உங்கள் மனமார்ந்த வாழ்த்துக்கு மிக்க நன்றி திரு.தனபாலன்!

      Delete
  2. செம்மையான நடை .அருமையான கருத்து,செழுமையான சொற்கள்.மொத்தத்தில் நல்ல படைப்பு

    ReplyDelete
    Replies
    1. உங்கள் வருகை கண்டு மகிழ்ந்தேன்! உங்கள் ஆழமான கருத்திற்கும் பாராட்டிற்கும் நன்றி பல, மகிவதனா!

      Delete
  3. என்ன ஒரு தமிழ் பற்று. கலக்கல் கிரேஸ்... உங்கள் சிறந்த படைப்புகளில் இதுவும் ஒன்று...

    ReplyDelete
    Replies
    1. உங்கள் தொடர் ஊக்கத்திற்கும் பாராட்டிற்கும் நன்றி ஸ்ரீனி!

      Delete
  4. அருமை சகோததரே! அழகான வரிகள் கண்டு மகிழ்ச்சி.
    //தேவைக்குப் பிறமொழி பேசினும்
    தேன்தமிழ் உயிராய்ப் பேசிடுவாய்
    தேங்கிப் பழமையில் ஊறாமல்
    தேயாமல் புதுவுலகில் பிணைத்திடுவாய்// தமிழின் சிறப்பே அது தான். காலத்திற்கேற்ப தன்னை மாற்றிக் கொண்டும் ஆனால் தன் தனித்தன்மையை இழக்காத தன்னிகரற்ற மொழி தமிழ் மொழி. வாழ்க தமிழ் என்று சொல்ல மாட்டேன். வளர்க தமிழ். நல்லதொரு ஆக்கத்திற்கு நன்றீங்க சகோததரே..

    ReplyDelete
    Replies
    1. // தன் தனித்தன்மையை இழக்காத தன்னிகரற்ற மொழி தமிழ் மொழி. வாழ்க தமிழ் என்று சொல்ல மாட்டேன். வளர்க தமிழ்.// உண்மைங்க!
      உங்கள் மனமார்ந்த ஆழமான கருத்திற்கு உளங்கனிந்த நன்றி சகோ!

      Delete
  5. அழகிய வரிகள்...
    செந்தமிழை ரசித்தேன்...

    ReplyDelete
    Replies
    1. மகிழ்ச்சியும் நன்றியும் சௌந்தர்!

      Delete
  6. ஒரு குழந்தைக்கு இதைவிடச் சிறப்பாகக் கூற ஏதுமில்லை!

    வரிகள் யாவுமே எம் தமிழ் அது செந்தமிழ்
    என வரிந்துகொண்டு ஆர்ப்பரிக்கின்றன...

    மிக அருமை! வாழ்த்துக்கள் தோழி!

    ReplyDelete
    Replies
    1. உங்கள் அன்பான மனமார்ந்த கருத்தைக் கண்டு மிகவே மகிழ்ந்தேன் தோழி!
      பல நன்றிகள் தோழி!

      Delete
  7. தாய்ப்பால் உடலுக்கு போல்
    அவரவர் தாய்மொழிப்பால் கொள்ளும் பற்றுதானே
    அறிவுக்கு உறுதி தருவது
    மனம் கவர்ந்த பகிர்வு
    பகிர்வுக்கும் தொடரவும் வாழ்த்துக்கள்

    ReplyDelete
    Replies
    1. //தாய்ப்பால் உடலுக்கு போல்
      அவரவர் தாய்மொழிப்பால் கொள்ளும் பற்றுதானே
      அறிவுக்கு உறுதி தருவது// நீங்கள் சொல்லியிருப்பது ஆணித்தரமான உண்மை ரமணி ஐயா, இதைப் புரிந்துகொள்ளாமல் அயல்மொழி மோகத்தில் அறிவை இழக்கிறோம்!
      உங்கள் வருகைக்கும் வாழ்த்திற்கும் மிக்க நன்றி ஐயா!

      Delete
  8. Replies
    1. உவகையுடன் நன்றி ஐயா!

      Delete
  9. இறுதி பத்தி மிகவும் கவர்கிறது.
    செந்தமிழில் செழுமையான வரிகள் .

    ReplyDelete
    Replies
    1. மிக்க நன்றி தோழி!

      Delete
  10. வணக்கம்
    செந்தமிழைச் செம்மையாய்ப் பற்றிடுவாய்
    செம்மொழி நிலவிலும் பதித்திடுவாய்
    செவ்வாயோ எவ்வாயோ எக்கிரகம்
    சென்றினும் தமிழ்கொண்டே சென்றிடுவாய்

    எம் மொழி பற்றிய கவிதை நன்று வாழ்த்துக்கள்

    -நன்றி-
    -அன்புடன்-
    -ரூபன்-

    ReplyDelete
    Replies
    1. உளமார்ந்த நன்றி ரூபன்!

      Delete
  11. அருமையான வரிகள்
    ரசித்தேன்

    ReplyDelete
    Replies
    1. ரசித்தமைக்கும் கருத்திட்டமைக்கும் நன்றிங்க ஜெயக்குமார்!

      Delete
  12. தமிழில் பேசினால் தரக்குறைவாகத்தானே பார்க்கிறது இச்சமூகம்...ஆங்கிலம் பேசுபவர்களைத்தானே அதிபுத்திசாலிகளாக பார்க்கிறது...

    ReplyDelete
    Replies
    1. அப்படிப் பார்க்கும் சமூகம் மூடமானது என்றே கொள்ள வேண்டும். தாய்மொழியை முதலில் தெரிந்து கொள்ளவேண்டும், பேச வேண்டும். சமூகம் அதைப் புரிந்துகொள்ளும் நாள் வரும்..அதுவரை நாம் செய்துகொண்டிருப்போம்..உங்கள் கருத்திற்கு நன்றி!

      Delete

உங்கள் கருத்தை வரவேற்கிறேன்...

LinkWithin

Related Posts Plugin for WordPress, Blogger...