ஆழி சேர்ந்திடுவேனோ - நீரின் ஏக்கம்

அடர்ந்த முகிலின் அழுத்தம் மிகுந்து
அருமை மழையென நிலம் விழுந்து
அருவியாய் உயர் மலையில் பிறந்து
ஆறாய் மேடு பள்ளங்களில் விரைந்து
அழகாய் வளம்சேர்த்து துள்ளல் நிறைந்து
ஆழி சேர்ந்திடுவேன் மனம் மகிழ்ந்து

அருமை மக்களே கேட்பீர் செவிதிறந்து
அகற்ற வேண்டிய பொருள் நிறைந்து
அழியா நெகிழி(பிளாஸ்டிக்)  எங்கும் மிகுந்து
ஆபத்து உண்டே இடையில் மறைந்து  
அறிந்தும் அறியாமலும் என்வழித் தூர்ந்து
ஆழி சேர்ந்திடுவேனோ மனம் மகிழ்ந்து