என் தமிழை, உலகமே கேள்!

என் தாய் மொழியாம் தமிழ் எவ்வளவு மேன்மை உடையது

பேசுவதற்கான ஒரு மொழி மட்டுமா என் தமிழ்?

இல்லை இல்லை - எவ்வளவு சிறப்பு மிக்கது 

என் வரலாறை இனிதாய்ச் சொல்கிறதே 

என் மூதாதையர் வாழ்வை கண் முன் விரிக்கிறதே
கடந்து சென்ற சில ஆண்டுகள் மட்டும் அல்ல 

என் வம்சத்தின் ஆயிரக்கணக்கான ஆண்டுகளை 

என் முன்னோர் வாழ்ந்த இனிய அறம் மிக்க வாழ்வைச் சொல்கிறதே
இயற்கையோடு இணைந்த இனிய வாழ்வு முறையைச் சொல்கிறதே
இவ்வளவு சிறந்ததா என் குடி?

இவ்வளவு சிறந்ததா என் முன்னோர் வழி? 

இவ்வளவு தொன்மையானதா என் மொழி?
என் பிறப்பிலே எனக்கு அகந்தை அளிக்கிறதே 

என் மொழி தமிழ் என்பதால் அணுக்களில் ஒரு பரவசம் பாய்கிறதே 

குருதியில் ஒரு புத்துணர்ச்சி ஓடுகிறதே!
உலகமே கேள்! பிற மொழியினரே கேளுங்கள்!

என் இனிய தமிழ் மொழியை அறிந்து கொள்ளுங்கள் 

என்று முழங்கும் இறுமாப்புத் தருகிறதே
மகிழ்ச்சியில் கண்கள் குளமாகின்றனவே 

என் தமிழே! என் தமிழே! என இதயம் துடிக்கிறதே
தமிழை உயர்த்த சிறுபிள்ளை நான் செய்வதற்கு ஒன்றும் இல்லை 

ஆனால் கட்டித் தழுவி என்னுடன் வைத்துக் கொள்வேனே 

பாருங்கள் என் பெருமையை என்று பறை சாற்றிக் கொள்வேனே!

என் தமிழை அதன் தொன்மையை அதன் பெருமையை 

மென்மேலும் கற்பேனே உலகமெல்லாம் சொல்வேனே 

இன்றைய கண்டுபிடிப்புகள் எல்லாம் தமிழில் சேர்ப்பேனே 

புதிய கண்டுபிடிப்புகள் தமிழில் செய்வேனே 

உலக மனிதரெல்லாம் தமிழ் அறிவார் என்ற நாள் வரும் 

அன்று என் தமிழ் அன்னை பூரித்து மேலும் செழிப்பாளே!