என் தமிழை, உலகமே கேள்!

என் தாய் மொழியாம் தமிழ் எவ்வளவு மேன்மை உடையது

பேசுவதற்கான ஒரு மொழி மட்டுமா என் தமிழ்?

இல்லை இல்லை - எவ்வளவு சிறப்பு மிக்கது 

என் வரலாறை இனிதாய்ச் சொல்கிறதே 

என் மூதாதையர் வாழ்வை கண் முன் விரிக்கிறதே
கடந்து சென்ற சில ஆண்டுகள் மட்டும் அல்ல 

என் வம்சத்தின் ஆயிரக்கணக்கான ஆண்டுகளை 

என் முன்னோர் வாழ்ந்த இனிய அறம் மிக்க வாழ்வைச் சொல்கிறதே
இயற்கையோடு இணைந்த இனிய வாழ்வு முறையைச் சொல்கிறதே
இவ்வளவு சிறந்ததா என் குடி?

இவ்வளவு சிறந்ததா என் முன்னோர் வழி? 

இவ்வளவு தொன்மையானதா என் மொழி?
என் பிறப்பிலே எனக்கு அகந்தை அளிக்கிறதே 

என் மொழி தமிழ் என்பதால் அணுக்களில் ஒரு பரவசம் பாய்கிறதே 

குருதியில் ஒரு புத்துணர்ச்சி ஓடுகிறதே!
உலகமே கேள்! பிற மொழியினரே கேளுங்கள்!

என் இனிய தமிழ் மொழியை அறிந்து கொள்ளுங்கள் 

என்று முழங்கும் இறுமாப்புத் தருகிறதே
மகிழ்ச்சியில் கண்கள் குளமாகின்றனவே 

என் தமிழே! என் தமிழே! என இதயம் துடிக்கிறதே
தமிழை உயர்த்த சிறுபிள்ளை நான் செய்வதற்கு ஒன்றும் இல்லை 

ஆனால் கட்டித் தழுவி என்னுடன் வைத்துக் கொள்வேனே 

பாருங்கள் என் பெருமையை என்று பறை சாற்றிக் கொள்வேனே!

என் தமிழை அதன் தொன்மையை அதன் பெருமையை 

மென்மேலும் கற்பேனே உலகமெல்லாம் சொல்வேனே 

இன்றைய கண்டுபிடிப்புகள் எல்லாம் தமிழில் சேர்ப்பேனே 

புதிய கண்டுபிடிப்புகள் தமிழில் செய்வேனே 

உலக மனிதரெல்லாம் தமிழ் அறிவார் என்ற நாள் வரும் 

அன்று என் தமிழ் அன்னை பூரித்து மேலும் செழிப்பாளே!

என் தமிழ்! என் அடையாளம்!

எனக்கு என்று ஒரு அடையாளம் உண்டு

என் தாய், என் தந்தை, என் தாய் மொழி,

என் ஊர், என் நாடு என்று

இவற்றில் எதை விட்டுக் கொடுத்தாலும் 

என் அடையாளம் அழிந்து விடும்

ஆனால் இன்று பெரிதும் ஒதுக்கப் படுவது

தாய் மொழியாம் தமிழ் மொழி!

நம் தாய் மொழி நம் நாவில் சீராக இல்லாவிட்டால்

நம் தமிழ்த் தாய் நம் வீட்டில் ஆட்சி செய்யாவிட்டால்

நம் தேன் தமிழை  நம் குழந்தைகள் ருசிக்காவிட்டால்

நம் ஓங்கு தமிழ் எழுத்துகள் நம் விரல்களில் ஆடாவிட்டால்

நம் செம்மையான தமிழ்க் கருவூலத்தை நாம் மறந்தால்

ஐயோ! வெட்கக்கேடு, தன்மானக் கேடு!

'நான்' என்பதை இழந்து பல செல்வம் திரட்டினாலும் என்ன பயன்?

மேடைக்கு முகமூடி அணியலாம் அதுவே வாழ்வானால்?

சிந்திப்போம், செயல்படுவோம்!

தமிழ் மேன்மை அடைய உழைக்க வேண்டாம்

ஏன் என்றால் அதன் மேன்மை மிகப் பெரிது

அதனைக் கீழே இறக்காமல் இருந்தால்

அதுவே நாம் செய்யும் பெரும் பணி!

தமிழ் என் தாய் மொழி! என் பண்பாடு, என் வாழ்க்கை!

எனக்கும் என் சந்ததிக்கும் அதுவே முதன்மை!

இதனை மறக்காமல் வாழ்வது என் கடமை!

இப்படி ஒவ்வொரு தமிழனும் நினைத்தால் அதுவே மேன்மை!

என் தமிழ் குடி

இரண்டு ஆயிரம் ஆண்டுகளுக்கு முன்பே  

இயற்கை குறித்த தெளிந்த புரிதலும் அறிவும் பெற்று 

நிலத்தை அதன் தன்மை பொறுத்து ஐந்து வகையாகப் பிரித்து 

இயற்கையுடன் இயைந்த வாழ்வு நடத்திய குடி என் தமிழ் குடி!

நில வகை ஐந்திற்கும் அந்த அந்த நிலத்தில் மலர்ந்த மலரால் 

குறிஞ்சி முல்லை மருதம் நெய்தல் பாலை என்று பெயர் வைத்து 

நில வகைக்கு ஏற்ப உணவு பண்பாடு பொழுது போக்கு அனைத்தும் வகுத்து 

சீரான இனிய வாழ்வு வாழ்ந்த நல்ல குடி என் தமிழ் குடி!

அறமும் வீரமும் வேறு வேறாய் இல்லாமல் 

இனிய இல்லறமும் வீர நாட்டுப் பற்றும் கொண்டு 

இல்லமும் நாடும் காத்து சொல் வன்மையும் அறிவும் செறிவும் 

அழகாக இணைந்த வாழ்வு வாழ்ந்த நல்ல குடி என் தமிழ் குடி!

ஞாலத்தின் பல  நாகரிகங்கள் தோன்றுவதற்கு முன்பே 

முதலாய்த் தோன்றி மூத்த நாகரிகங்களில் ஒன்றாய் உயர்ந்ததாய் 

இளமை குன்றாமல் இனிமையும் ஈர்ப்பும் மேலும் மேலும் பெருகி 

தொன்று தொட்டுச் சிறப்பாய் விளங்கும் குடி என் தமிழ் குடி!